Re: [創作] 龍的痕跡 (中)
網誌圖文版:
http://ngtsinlam.blogspot.com/2010/03/blog-post.html
毋過黃元交是按怎老來煞行著好字運,佇蒜頭庄是一人講一款。
頂頭厝黃元交囝孫仔講,有一日來一個老歲仔,用一枝紅扁擔擔了兩個攜
籃予黃元交,央黃元交替伊保管,老歲仔從此了後煞毋捌閣出現過。過一冬後,
黃元交才共攜籃頂的崁布掀開,發現全是白鑠鑠的銀兩,黃元交醒悟彼是土地
公來相助,毋才變成好額人。
到今頂頭厝黃家祖厝,猶閣祀(tshai7)彼當時擔來攜籃的紅扁擔;而且
黃家族人祭祖的時陣,干焦會當拜糙米飯按呢。
新厝內黃家是家己咧傳講,黃元交佇新厝內做長工,黃希哲彼當時藏銀兩
的窟,長工曷有毋知的?莫講黃元交去偷提一寡,就是入去藏銀兩的窟行踏一
輾,轉去到厝,跤蹔蹔咧,對跤指頭仔縫落的銀屑仔,就有夠普通人食穿足久
矣。
毋過上會採信得的講法應該是:拄才故事敢不是講黃元交佇新厝內負責舂
米?伊共米舂了,米糠就倒落去朴子溪底。新厝內佇朴子溪水尾的「五十六尾」
這個所在有一塊地予伊,黃元交佇遐搭豬牢,平常時四界抾人(lang7)無愛
挃的破病豬來飼,就用水頭流過來的米糠做飼料,破病豬竟然也予伊養飼甲肥
漬漬(pui-tsih-tsih)----所以有人講彼塊地是一個「豬哥穴」。總講一句,
黃元交尾後靠著飼豬的副業,粒積袂少家伙。
□ □ □
「又閣講黃元交佇新厝內倒米糠。」我講:「猶是彼個老問題,朴子溪無
佇新厝內邊仔啊。」
阿爸斟酌想誠久。「無定著敢若老輩所講,朴子溪是一尾臭聾龍。」
「臭聾龍?」
「往過的人就攏傳講朴子溪是一尾臭耳聾龍,講緊煞講做臭聾龍啦。臭聾
龍平常時耳空真重,攏聽袂著聲,干焦佇透早天拍殕仔光的時陣,才聽會著庄
頭雞咧啼,所以無論庄民按怎搬徙,朴子溪攏一直綴咧走,誠濟老庄頭就按呢
予水淹崁去。」
「佇咱蒜頭遮,敢有庄頭去予淹崁去?」
「毋捌聽講過。」
□ □ □
其實有啦。我搜揣百外冬前日本人畫的臺灣堡圖,佇大?榔西堡揣著「蒜
頭庄」,佇蒜頭庄東南爿有一個我毋捌聽過的地號名,「筏仔路」。佮今馬的
蒜頭空照圖對比,百外冬前「筏仔路」這個所在佇今馬的溪底。
(圖:日治台灣堡圖)
才大概一百冬爾爾,一個庄頭無去囉,煞無人會記得。
----兩百四十冬前的代誌,我會當揫偌濟轉來?
我決定按兩百四十冬前代誌的路線來行。我騎鐵馬來到佇蒜頭東爿的中庄
仔,朴子溪佇中庄仔東爿,向南流過去。
在地有一句古早話:「嫁中庄仔peh溪崎,嫁蒜頭看會社。」往過嫁到中
庄仔的查某人透早就愛到溪墘擔水,這馬雖然毋免按呢,毋過中庄仔猶原倚近
朴子溪,地理無變。所以講黃希哲本底是中庄仔人,踮中庄仔順溪欲揣地,這
是會當採信得的。
我順外環路騎到新厝內,新厝內徛佇中庄仔西南爿,已經離朴子溪有一塊
仔。兩百四十冬前,朴子溪敢有影流過這搭?我敢會當相信一喙傳一舌、提袂
出證據的傳說?無影無跡,閣講甲對同對同的話,是欲按怎揣著入榫的所在?
踮大廳拜公媽了後,我順外環路閣再騎向南,拄著新開的鐵馬專用道,我
換箍起去鐵馬專用道。沿路向南勢,行過死溪仔、榕樹王,才遇著佇遮對本來
南北向踅做東西向的朴子溪。
(圖:朴子溪腳踏車自行車道)
我徛踮橋頭看,朴子溪彼爿看過去就是蒜頭糖廠。公元一八九五年日本人
來臺灣,開始計畫起會社做糖,所以會當掠準講一百冬前,朴子溪就是佇這陣
的所在。毋過伊的舊溪床到底佇佗位、啥物時陣改道,也猶閣是一個臆袂出來
的謎題。
(圖:蒜頭糖廠與朴子溪)
金金相無聲流過的溪水,我雄雄感覺誠忝頭。對清朝開始,唐山過臺灣坐
船入朴子溪的人,發現朴子溪以「龜蛇相吞」的屈勢箍蒜頭庄半輾,親像較按
怎踅就踅袂出去。所以傳出「對下早仔踅到下昏,踅袂出蒜頭庄」的講法。伊
自古就按呢會引人迷亂,帶著神秘的氣氛。
這尾神秘的龍,干焦恬恬仔流,袂主動共你講任何代誌。
---
未完待續,連結可看全文
--
http://ngtsinlam.blogspot.com/
活水來冊房,
本土、語文、舊書、文獻。
--
※ 發信站: 批踢踢實業坊(ptt.cc)
◆ From: 163.20.147.65
推
03/22 22:29, , 1F
03/22 22:29, 1F
→
03/23 01:17, , 2F
03/23 01:17, 2F