[新聞] 郭晉安谷底回望：真係好坎坷

看板HK-drama作者wasabi1 (wasabi)時間12年前 (2012/06/05 13:37)推噓3(3推 0噓 1→)

留言4則, 3人參與討論串1/1

郭晉安谷底回望：真係好坎坷郭晉安：我冇望子成龍！郭晉安入行廿五年，事業登上高峰亦擁有美滿家庭，自從一對仔女出世後，他坦言生活起了巨大變化，「養兒一百歲，長憂九十九」，他對子女愛得緊張。由今日起連續五日，郭晉安會與大家分享家庭、事業和鮮為人知的圈中辛酸事！我同太太歐倩怡2006年拉埋天窗、2008年大仔郭令山出世、2011年再追多個女郭以雅。我四十三歲做老竇，生小朋友係我計劃之內，有擔心老來得子會同仔女有代溝。我結婚時雙親都離開咗，無法見證到我嘅人生大事，都有遺憾，依家到我同仔女有年齡差距，我會諗番第日啲仔女結婚時，自己仲喺唔喺度呢？如果個仔好似我咁遲婚，我真係再擺唔到多四十年o架嘞！我屋企有五兄三姊，自小阿爸為口奔馳、媽咪係家庭主婦，哥哥家姐照顧我最多，所以我缺乏一套教育子女嘅藍本，需要自製一套教育子女嘅方式。我本身個人唔係咁專制，覺得如果下下都黑白分明、規行矩步嘅話反而造成代溝。我視仔女為朋友，父母唔好做嚴父嚴母，我主張冇階級。初為人父好驚大仔令山出世之後，令我嘅生活產生好大變化，起初覺得「好驚」！雖然佢未出世前我已經有晒心理準備，但事實原來同諗嘅有好大出入，覺得真正進入人生另一階段！我以為可以輕鬆咁面對，但原來係唔得！最印象深刻係令山七、八個月大時，有次半夜發高燒，我哋兩公婆驚到手足無措，佢不停喊又唔識講咩事，最後送咗佢入院。我當時諗小朋友咁細個點解要受呢啲折磨？佢又有鼻敏感，有次捽眼搞到隻眼腫到雞蛋咁大，我感覺到佢自己都好驚，好彩我同太太都係基督教徒，認為子女患病唔應該將責任歸咎父母身上，我哋互相勉勵將個仔交託神。把愛世代相傳我會幫小朋友換片、沖涼，第日佢結婚我呢啲相好有用，有相為證，等佢知道父母對佢付出咗，一定要好似我哋咁延續落去對佢哋嘅小朋友。我冇望子成龍，只求佢哋健康成長，我哋冇揀名牌學府，唔需要搬屋遷就。間幼稚園千幾二千人考，面試時囝囝好叻錫咗老師一啖。令山好乖巧，會表現童真一面，佢第一日上堂喊到呼天搶地，但第二日冇喊兼自己入班房，點知第三日又喊，原來佢以為只係返兩日！我同太太都試過為子女問題嗌交，但最緊要大家先冷靜落嚟，最終都能夠解決問題。我會經常親自接送令山返學、放學，希望用最多嘅時間陪佢成長，唔想佢做港童！佢依家好叻識自己着衫、着褲、着襪。我陪佢出入就係怕佢太倚賴工人，我要訓練佢乜都自己做。早前傳聞有拐子佬出沒，我都有煩擾過，好在依家知道個原因可能係個別家庭糾紛同誤會，未去到大社會嘅問題！我試過瞓唔着上網睇人留言，大家都好擔心，但我冇同個仔講有拐子佬，唔想佢知道世界上有咁多壞人。郭晉安谷底回望：真係好坎坷郭晉安1986年參與首部劇集《城市故事》展開演藝生涯，翌年憑參演大製作《誓不低頭》一炮而紅，但同時令他陷入事業的困局。我拍完《誓不低頭》後好快上位，但同時間陷入浮游階段，我要諗方法繼續向上，但又要搵錢包裝自己，愈包裝自己，啲錢又唔知點嚟。我記得當年出席台慶嗰套戰衣都要慳，亦試過戴住鴨嘴帽頭耷耷搭港鐵。拍完廠景半夜收工，試過等成粒鐘搭第一班巴士過海，死都唔肯搭的士就係要慳。返到屋企攰到第二朝出門前先沖涼，真係好坎坷！外闖拍劇環境惡劣直到1994年演出劇集《生死訟》，成為咗全年最低收視劇集，我嘅事業可以話跌入谷底。當時好大打擊、意志消沉。以為自己好得、好掂，但原來好多事唔係人可以掌握同控制，我一定要搵一條出路。直到1995年，我決定離開無綫外闖，之後有外來公司邀我外出拍《孫子兵法》，酬勞可觀到可以買樓。但當時好辛苦，啲拍攝地點好恐怖，基本上似電影中打仗軍人住嘅地方，食宿都唔得，以為有菜食，其實喺地下摘啲唔知咩就炒畀你，居住環境好惡劣，酒店冇冷氣、冇水！之後又拍咗《新龍門客棧》，工作同收入係穩定嘅。 1998年我決意重返無綫，當時監製梁家樹同我講：「你返嚟就好嘞，點解唔早啲返。」我當時好感動，發現無綫先係真正嘅「屋企」，我寫張卡畀梁家樹話自己會努力，會搵番失去嘅嘢。之後我有機會拍《創世紀》，但問題又再出現，同時間有人用可觀酬勞請我出去拍劇。我諗住放棄拍《創世紀》，當時珍姐話做乜咁傻放棄呢個機會，我同佢講對唔住，我真係好需要呢舊錢。點知當年台慶，我竟然抽到架車，我即刻同珍姐講，我可以拍喇！因為我賣咗架車就有嗰舊錢。我深深感覺到一切自有主安排！（明日待續）口述：郭晉安 Source:http://www.ihktv.com/roger-kwok-bottomed-look-back.html 郭晉安谷底回望：真係好坎坷晉安濕濕稅：交咗部保時捷郭晉安雖曾陷事業低潮，但憑劇集《戇夫成龍》阿旺一角起死回生，於2003年《萬千星輝頒獎禮》中連奪三個大獎。「阿旺」更令他身家暴漲，連續兩年交了「保時捷」的巨額稅款。喺電視劇《戇夫成龍》中我飾演丁常旺（阿旺）一角，出街後人氣一時無兩，更喺2003年嘅《萬千星輝頒獎禮》中勇奪「我最喜愛的男主角」、「我最喜愛的電視角色」，與同劇拍檔宣萱齊奪「我最喜愛的拍檔（戲劇組）」，將事業推上高峰。2005年我再憑《阿旺新傳》勇奪「最佳男主角」，自此我對演藝事業有另一番睇法，成個人開竅咗。做唔做主角已經唔緊要，最緊要你有角色做，咩角色都有機會成為主角，我有信心拿捏到，好多謝無綫製作部高層梁家樹，我有今時今日都係佢畀機會我。名利雙收好多人話，自「阿旺」之後我抽離唔到，之後嘅演出都流住「阿旺的血」，我認為係因為阿旺太成功所致。嗰陣重播《戇夫成龍》同我之後嘅作品，其實有好明顯嘅分別，可能觀眾太留戀阿旺先有呢個感覺。2005年我再拍《阿旺新傳》，因為背負多咗知名度，別人嘅眼光令我有壓力。再去到《東西宮略》，監製要我將個昏君演到討人喜歡，我知我點都要拎少少「阿旺」出嚟，但當中只有阿旺特質，絕對唔係阿旺嘅倒模，我好清楚。「阿旺」嘅成功的確為我帶來名與利，畀咗我今時今日，同今生今世嘅名氣。係豐收咗，一年搵番晒我過去廿年嘅錢，交稅嗰時嚇死我，交咗一部正常保時捷嘅稅款，第二年再交多一部，當時先覺得好驚好恐怖，但係開心嘅！（明日待續）口述：郭晉安 Source: http://www.ihktv.com/roger-kwok-bottomed-look-back.html/2 -- ※ 發信站: 批踢踢實業坊(ptt.cc) ◆ From: 42.2.90.215

推

kzzoz80

06/05 14:02, , 1^F

06/05 14:02, 1^F

※ 編輯: wasabi1 來自: 42.2.91.231 (06/06 13:28)

推

elin033

06/09 12:08, , 2^F

06/09 12:08, 2^F

→

elin033

06/09 12:09, , 3^F